|
心情動態：
來自非公營房屋 |
11萬裝修全包宴！40日改造前後全對照
2016-09-30 09:52:00 HKT
升斗市民苦等數年終於上到樓，層公屋隨時由二人世界住到仔女開枝散葉，所以家陣好多租戶就算銀根掹掹緊，都肯花多啲錢做裝修。近排有裝修公司提供「裝修全包宴」，11萬裝修費包設計、連工包料同訂造傢俱，40日內將粗陋的交樓標準打造成溫馨窩居。 好似鄧生鄧太咁，六年前開始排公屋，去到舊年12月先獲派安達邨一間二人公屋，面積大約234方呎，到今年6月收信通知交樓，就即刻開始同裝修公司傾點樣打造安樂窩，本報記者亦開始見證單位一間灰白醜怪的水泥吉屋點樣響40日入邊改頭換面。 住得公屋，份人通常貼地。6月中收樓當日，鄧生鄧太企響連地磚都無嘅水泥地上邊，望住幾張手繪概念圖，略帶期待咁話，希望整個裝修方向以實用為主，「我地諗住個廳大啲，最多偷多啲位擺野。顏色方面就想淺色啲、舒服啲，所以成間屋都油淺藍色。」 公屋裝修免租期得14日，另一邊廂，舊居租約期亦都就快到期，裝修遲咗唔知點算好，所以佢地收樓之後，隨即交匙畀後裝修公司，極速開工，去到八月第一個周末間屋已經住得。 裝修完的公屋，起居空間舖淡棕色木紋磚，全屋牆身油晒做天藍色，感覺舒服。公屋交樓標準無間隔，設計師安排窗前地方做睡房，用一組通頂衣櫃同趟門分隔開，房入邊升高地台做床，加埋客飯廳多個組合櫃，夠晒位擺鄧太心愛嘅鞋。廚房同廁所裝晒假天花，遮咗部份核突喉管，廁所再加埋鏡櫃同棗紅色邊洗手盆櫃，入到起乾淨舒服。 八月初入伙當日，以十分做滿分，佢地兩個畀間屋值八分，「一開始嗰時得啲圖，佢唔砌出黎，你都唔知會唔會同我諗嘅、或者佢畫嘅有唔同。依家間屋出黎果個效果張圖或者我地諗嘅八、九成似」。 短片：http://video.appledaily.com.hk/m...930_fin_301v2_w.mp4   間睡房後大廳長9呎8、闊8呎7，牆身油粉藍色配木紋地磚，感覺溫馨。  浴室加裝假天花、棗紅色邊洗手盆櫃及鏡櫃，裝修後感覺整潔，淋浴位置維持原狀，無加裝浴屏。  公屋交樓時為無間隔開放式，設計師以到頂衣櫃間出睡房，入房樓梯都有做櫃桶，盡量增加儲物空間。  廁所外亦有加裝一組組合櫃，預留位置放雪櫃。  觀塘安達邨整個屋邨11幢住宅樓宇，今年陸續入伙。 |
||
|
|
|||
|
心情動態：
來自非公營房屋 |
笑到有腹肌！兩大裝修甩轆位
2016-09-30 09:53:00 HKT 公屋裝修黎講，無超支、無延誤、望落靚靚仔仔、仲有啲啲似私樓，所以11萬銀聽落都幾抵，業主都畀到到八分，算高分。不過，裝修難十全十美，今次就因為啲細節同用料瑕疵，就無咗果兩分。 響間屋四圍游走，望真啲、拉吓櫃、摸兩摸，會見到油漆明顯油歪咗些少、收口位唧膠唔夠靚仔，距離新地、太古一類高質私樓收樓標準有幾分距離。 整體黎講，間屋有兩個比較大嘅粗心大意或者唔貼心。 第一，地台床尾、細窗側邊有個凹位，安裝咗一組組合櫃。回帶到六月中，裝修師傅上到間屋，指住個凹位話，「呢啲電掣(穿)過返個櫃出黎，畀你部電視機用。」 去到八月初入伙當日，個組合櫃下邊有塊櫃門畀塊電視層板檔住咗，變咗一塊開唔到嘅櫃門，變咗電線過唔到。最終裝修公司響櫃門度開窿穿線出黎，咁電視機先有電用，但個櫃門始終開唔到。 第二，地台床頭板，前邊裝咗三塊軟墊，不過一拉隔離個趟櫃出黎，個櫃角會磨到塊軟墊，發出「滋滋」聲，所以住戶一定要先扯開塊軟墊，再拉出趟櫃。如果體貼啲，將床頭板磨返薄啲，就唔會出現呢個問題。  組合櫃其中一隻櫃門被電視層板阻檔，無法正常開啟。  最終裝修公司將櫃門開窿走電線。  直接拉出衣櫃會與床頭軟墊磨擦，發出「滋滋」聲的雜音，所以要先扯開床頭軟墊(以魔術貼黏貼)方可拉出衣櫃。  冷氣機喉管經過睡房穿出客飯廳，油漆油啲唔油啲，略嫌礙眼。 |
||
|
|
|||
|
心情動態：
來自非公營房屋 |
11萬裝修費點樣計出黎
2016-09-30 09:54:00 HKT 鄧生鄧太佢地搵果間裝修公司，收費兩大部份，裝修工程一舊錢，訂造傢俱一舊錢。 工程部份即喺水電泥水，連工包料，同埋單位邊固定裝置，加埋盛惠近6萬元，包括油好全屋油漆、鋪晒廳同房木紋磚、廚房廁所假天花、廁所洗手盆櫃同鏡櫃。另外租客搵咗裝修公司幫手裝浴室寶要加1,400元（浴室寶自費），而間屋裝多兩個電掣位，每個盛惠600元。 至於訂造傢俱部份，主要有5大傢俱組成。先講睡房，地台床長7呎半、闊4呎半，地台分作8個方格，以揭蓋式設計，深1呎3吋，夠晒位擺過季衫，而且單位樓底高8呎半，升高地台之後房入邊空間感尚算可以，而睡房前邊級樓梯都做埋儲物櫃，算物盡其用。 不過，基於成本考慮，地台床儲物格，無用到金屬鉸位或者油壓，而且，收納取物每次都要成塊揭開都幾麻煩。收樓果時地台床有塊木板爆開咗，裝修公司就話黎緊會換咗果塊板。 分割睡房嘅通頂衣櫃，長逾5呎3，深度1呎9吋屬正常水平，而地台床尾端的窗戶亦安裝一組組合櫃。不過間屋最大嘅採光窗響睡房入邊，睡房一關門，室內自然光不足，就一定要開燈。 而其餘兩組到頂組合櫃分別響大門旁邊同廁所外邊，門邊櫃中間騰空，櫃的下半部份屬鞋櫃。整體黎講，傢俱款式以經濟實用為主，花臣唔多，5樣加埋大約5萬元。 咁到底成個裝修11萬算平定貴？每間裝修公司裝修費計法唔同，好難做一個Apple to apple既平較。 如果拆細睇，淨係搵大型傢俱，某本地大型連鎖傢俱品牌網站顯示，一個前後兩用組合櫃，叫做「公屋住戶優惠價」都收近1.7萬元。  業主趕住，6月收樓之後隨即開始裝修。  7月底已經完成基本裝修，開始進行傢俱裝嵌。 
|
||
|
|
|||
|
心情動態：
來自非公營房屋 |
公屋裝修亂拆野 隨時畀房署趕走
2016-09-30 09:54:00 HKT 房屋署表示，公屋租戶裝修時，部份固定裝置屬於不可改動或改動前需要作出申請，例如廚房灶台屬於可改動的裝置但須事先得署方批准。 公屋租戶裝修唔同私樓，要分清楚邊啲野拆得、邊啲唔拆得。如果唔跟規矩亂咁黎，隨時畀房署收返間屋。 房屋署發言人表示，據2016年修訂的最新指引，公屋單位的固定裝置分為甲、乙、丙三類： 甲類 － 不准許改動的裝置，例如廚房、廁所或浴室間隔牆、大門、廚房門及隔音窗等； 乙類 － 可改動的裝置但必須事先得署方批准，例如廚房灶台、窗花及廚房牆身瓦等； 丙類 － 可自行改動而毋須得到房屋署批准，例如睡房和信箱門鎖及室內油色等。 而上述固定裝置分類展示於各屋邨管理處告示板，以供租戶參考，至於申請改動乙類固定裝置的程序則會於租客手冊內列明。 如有發現違規改動單位涉及樓宇結構安全和公眾衞生，房署會發出修復通知書，租戶需於接獲修復通知書日期起60天內完成復修或還原。如有些修復工程，較為複雜而需較長時間方可完成，房署表示會按個別情況考慮延長其修復時間。若租戶未能完成修復而沒有合理解釋，房屋署會考慮對其單位租戶發出遷出通知書，終止租約。 不過，就住過去因違規改動單位且無完成修復，而被終止租約的個案數目，發言人指未有相關數據能夠提供。  
|
||
|
|
|||
|
心情動態：
來自非公營房屋 |
消委會五點裝修建議 鄧生：得一樣無做到
2016-09-30 09:54:00 HKT 鄧生、鄧太由於趕入伙，所以無問多幾間裝修公司報價就已經決定邊間裝修公司。 根據消委會數字，過去3年共接獲489宗有關裝修的投訴，當中278宗是關於服務質素，佔比逾半，屬投訴之冠，其次是關於裝修延誤，有71宗，排第3的是收費爭拗，佔63宗。 消委會就市民裝修提供以下數點建議，而本報記者亦問過鄧生鄧太佢地裝修果時有無做到，咁大致上佢地都有做齊嘅，除咗貨比三家做唔到。消委會建議及鄧生鄧太回應如下： 建議1：選擇工程承辦商時，不妨多邀請兩三間公司提供報價，以及參考公司的往績和顧客口碑。 鄧：報價就無多搵幾間，因為一早已經睇定左呢間裝修公司。主要喺因為佢上過電視、網上啲評語又幾好，而且想快啲搬入黎住，就無再花好多時間做比較。 建議2：不應單靠承辦商的口頭承諾，每項工程細節都必須以書面紀錄確認，所有後加項目必須預先報價作實，例如電掣位置及數量，應在動工前議訂數量及價錢。 鄧：有單據呀，一開頭果有一張單，寫清楚做咩櫃。 建議3：動工前應先訂立詳細的合約，除完工日期、工程項目、保養及釐定保險責任外，亦可要求訂明一旦工程延誤的賠償方案。 鄧：張單上邊有寫預計完工時間，但無寫工程延誤賠償。裝修通常都準時，口碑呀嘛。 建議4：消費者應定期前往裝修單位檢查進度、每次分階段付款前須與裝修公司核對進度及費用，假如發現工程未能達標，必須即時提出及落實解決方案，如交涉不果可聯絡本會協助。 鄧：有時送電器或者傢俱到單位，都會一星期上一、兩次黎。 建議5：消費者亦應儘早部署裝修工程，避免在最後一刻或工程進行中才作出項目改動，減少不必要的爭拗。 鄧：間屋地方唔係大呀嘛，你可以做到既傢俱，諗到既野都係得咁多，所以一開始個草稿就變左最後個成品。 
|
||
|
|
|||
|
心情動態：
來自安達邨 |
收到，張尺寸圖比左人，而家等設計圖
|
||
|
命裡有時終需有，
命裡無時莫強求。
|
|||
|
心情動態：
來自非公營房屋 |
收到，張尺寸圖比左人，而家等設計圖 |
||
|
|
|||
