|
心情動態：
來自非公營房屋 |
馬灣自救》
前長發商戶獲邀搞街市 辛苦開荒換自由馬灣，一個小小的島上，有幾名願意做「開荒牛」的街市佬，為這裡約萬五名居民開辦了首個小街市；他們都是前長發街市商戶，終於不用再受領展控制，來到這個與世無爭的小島上。
「開荒係好辛苦，朋友都好多閒言閒語，話呢度無得做。」菜檔老闆周先生指，當初沒有人夠膽來開檔，馬灣曾有兩檔菜檔也「捱唔住」結業。這兒人流少，多年來一直沒有街市，生活習慣和屋邨居民不同。他們習慣外出吃飯，或去超市買餸，要改變殊不容易。街市雖只有三個地舖面積，但最少要投資一百五十萬；當初沒有人敢做，最終由前長發商會主席李錦源帶頭承租。 街市現有五檔，包括鮮肉、水果、魚、凍肉及菜，基本款式都有。原本七位朋友講好了一起入馬灣搞街市，各賣不同的東西，一應俱全。怎料有人臨陣退縮，留下的人唯有頂硬上，周先生的菜檔旁兼賣凍肉，「我依家係咩都唔知，完全唔知（凍肉）市場係點，客人鍾意咩。所以我咩都入啲，賣唔出又要諗辦法處理。」開檔幾星期，仍未摸清客人口味，損耗很多，「賣唔出就丟，唔可以平賣，呢度嘅人唔接受。」屋邨街市可平價清貨，這兒的居民則寧可不買，買一定要是好的。 李錦源指，開荒困難重重。首先，地區偏遠很難請人，要補貼交通費，「嚟到咁山卡啦地方幫你打工，係感情分搭救。」因此他很感謝每位朋友及員工。運貨同樣困難；馬灣是禁區，運輸署遲遲未發牌給他的貨車運貨，至今仍未知何時能獲發牌，只好等禁區時限過了才運貨。要獨力處理各種問題，他曾經大壓力到失眠，瘦了十磅。 雖然開荒辛苦，但換來自由空氣。講起舊時在領展街市開檔，周先生越講越激動，「我哋又要俾佢市場監控價格。你諗住做質量咩？租都交唔到。因為旁邊嗰檔比你平一半。」當所有顧客都只望價錢牌，你也只好賣平貨，「每間店重新裝修，一模一樣，無晒特色，我哋全部都只係售貨員。」相比之下，馬灣街市有生氣得多，更不必遵守這麼多規則，不必受大財團欺壓。 撰文：關卓凌 攝錄：高仲明 
|
||
|
2004-10
|
|||
