|
心情動態：
來自非公營房屋 |
玩到笑出聲 10款日系騎呢遊戲app
2016-10-24 00:40:00 HKT  《Hidden my game by mom》共有30關，都算快爆機，但每關設計都有心思，希望佢快啲有更新出新關。  《Crazy Freekick》用足球做題材，可能女仔冇乜興趣，但玩落瘋狂度絕對超班，男女都會玩到笑。  《Behind You!!》除了用家姐，還可以轉用其他角色，用阿爺、貓仔甚至蝦仔跳舞都得。  《大根》、《馬之王子》、《大叔怪物》三款遊戲沒有中文名字，可以廠商USAYA搜尋。  如果唔熟日本動漫文化，但能覺得《馬之王子》入面嘅人面馬比較惡心。 有時返工返到攰或者搭車冇嘢做，都會手痕機癮起，《Pokemon GO》冇重大更新，不如試吓和風迷你小遊戲。近排日本興玩無厘頭風格，廠商hap推出嘅《Hidden my game by mom》玩密室解謎，尋找俾阿媽收埋嘅遊戲機。頭一、兩關都叫正常，玩到後尾阿媽會匿埋喺牆入面、間房仲有七龍珠叫神龍，每關都玩到忍唔住大叫「做乜啫你」。遊戲喺下載榜打入頭30名，其實同廠仲有唔少騎呢選擇，以下挑選十款偷閒小遊戲，記者就試過多次喺返工個位同搭車途中玩到儍笑，受到同事歧視，最正係有趣得嚟每局都係幾十秒玩完，開心完都冇人知你「吞卜」，如果你工作累了，不妨一玩。 1.Hidden my game by mom （平台：iOS、Android 售價：免費）常見嘅密室解謎遊戲，要搵出隱藏嘅遊戲機，但屋內有各式騎呢機關，俾阿媽發現又或者遇到特殊情況就會gameover，有乜特別情況？會踩到釘、俾蛇咬、俾差佬捉你偷銀包等等，間屋仲有大象、鱷魚、神龍等等，甚麼都有可能。 2.Crazy Freekick （平台：IOS、Android 售價：免費）射自由球嘅足球遊戲，控制射門方向避開防守，但除咗有防守球員同守門員，仲有高達、炸彈、鐵血戰士、蜘蛛俠等古怪事物，玩落發現每一關有提示要射邊個位，騎呢得嚟考觀察力。 3.Behind You!!（平台：iOS、Android 售價：免費）音樂遊戲，跟節拍按鍵跳舞，但中途阿媽會入房偷睇，呢個時候就要按住中間暫停掣扮嘢，其實記者好多時都會喺房入面做啲唔想俾屋企人見到嘅嘢，玩落有共鳴。 4.Crazy Chaser（平台：iOS、Android 售價：免費）跟蹤女生，對方回頭時要篤芒避開，考反應之餘仲成日會用假動作fake你，玩到後面會有感人ending講點解要跟蹤，唔係痴漢game。 5.貓跨欄（平台：iOS、Android 售價：免費）跳躍避開障礙物，簡單易玩，障礙物成日會做出出乎意料嘅舉動，不過就算搞到你gameover都只會笑，唔會嬲。 6.副隊長（平台：iOS、Android 售價：免費）《Crazy Freekick》射怪獸版本，要喺怪獸殺晒球場上觀眾前射低佢，每隻怪獸都有特別動作模式，有啲要攻擊時先露出弱點，畫面低能，但其實幾考操作技術。 7.大根にしがみつく女子高生（大根）（平台：iOS、Android 售價：免費 ）只需用一隻手指篤芒，連按爬上蘿蔔，放手停下，小心中途會有蘿蔔絲打走你。 8.うまのプリンスさま（馬之王子）（平台：iOS 售價：免費）戀愛遊戲近年講男女平等，女追男唔奇怪，但呢款《馬之王子》女主角追求嘅係人面馬，餵蘿蔔之外還可以同佢傾偈增進感情。 9.おじモン（大叔怪物）（平台：iOS 售價：免費）將Pokemon大叔化，玩法只係掉精靈球收集大叔，越多大叔就越多錢，勝在儲錢後可幫城市升級，之後有更多種類的精靈大叔。 10.Pineapple Pen（平台：iOS、Android 售價：免費）PPAP出了很多趕潮流嘅小遊戲，當中以呢款《Pineapple Pen》最好玩，要睇時機射穿生果，意外地幾高難度。 記者：司徒港燊攝影：梁志永 本帖最後由 傻 於 2016-10-24 10:21:03 編輯 |
||
|
|
|||
