我係有個女讀緊小學嘅三人家庭，排咗接近六年，上年中終於收到房署配房通知，獲派沙田水泉澳邨嘅1房單位，Yo！！！終於上到樓嘞。
接下來就要筹劃間屋點整，自己住嘅地方當然由自己設計啦，唔使揾什麽設計公司，自己同老婆商討最合適自己家庭嘅設計。
設計、裝修及傢俬係一間屋嘅靈魂，須知間公屋可能有排住，所以三樣嘢都不能馬虎，所以我定下（大原則），（大原則）係經過深思熟慮，對自己及屋企人最有利嘅决定，最好開工前確定。
（大原則）我揾自己相熟嘅cf裝修，溝通上完全冇問題。全屋木制傢俬全部度尺訂做，間屋地方有限，訂做可善用空間。地板用木紋磚，好睇得嚟又唔跣腳。用磚間兩間大房，磚間房隔音耐用又能承重，個女會長大，會需要私人空間，間兩大房就能各有自己嘅天地。廳同房之間嘅間隔牆做活動透光窗及做磨砂玻璃門，因廳冇窗要採光透風。房裝窗口式冷氣，廳裝分體式冷氣，最實際嘅做法，機價裝工都平啲。然後要决定傢俬餐枱嘅位置。廳做兩燈位，增加廳嘅品味，c櫃旁加電掣，我會做有燈嘅c櫃。餐枱位下加電掣，方便打邊爐用。改煤氣電掣位，我會做高身電視櫃。主房加TV位，睇電視唔使吓吓出廳睇。厨廁做鋁質假天花，美觀得嚟唔使驚天花剝落。厨房改灶頭到窗邊，係人都知房署呢個設計係同裝修佬夾埋搵住客笨，呢個位唔改唔得！用電磁爐，老婆炒餸冇咁熱又慳燃料費。雪櫃放廳，厨房地方更見使。廁所唔做浴屏，有機會要保養維修，仲有爆玻璃嘅危險。廁所加電掣位，天氣差嘅時候可駁抽濕機晾乾衣物。以上所有電掣位要跟據自身擺設而定，做咗無彎轉，要度準啲！
跟住逐一解構我間屋
主人房
面積約6呎5吋×11呎
主要配置:四呎油壓床、四呎衣櫃、三呎梳妝枱、入牆層板、3/4匹窗口機，32吋電視，窗帘、座地風扇及抽濕機。
加改位:加燈開關掣，床尾牆身加TV輸出及電掣，門側地下加電掣，改高冷氣開關（因應床頭板高度）
自我評價:房間寬闊，訂做嘅傢俬好fit唔嘥位，唔出廳都有電視睇
女房
面積約6呎5吋×7呎9吋
主要配置:三呎上櫃下床，三呎四吋書枱，二十二吋斗櫃，3/4匹窗口機，坐地風扇
加改位:加燈掣開關，書枱下及斗櫃上加電掣，改天花燈位置
自我評價:訂做傢俬發揮功用，上櫃下床再加斗櫃貯衣物夠晒用，書枱亦夠大，提醒大家一定要做上櫃下床，好處係個女有三兩個朋友仔嚟都可以入房坐低傾偈做功課，上床下櫃就會容納唔到！
廳
加改位:加燈開關掣，加c櫃惻及餐枱下電掣，加及改天花燈位，改煤氣電掣位
主要配置:5呎3吋高身電視櫃，6呎半c櫃，兩呎低身鞋櫃，76吋L型梳化床，40吋×28吋餐枱連四倚，一匹分體機，40吋電視，雪櫃，兩盞天花燈
自我評價:間咗兩間大房，廳嘅空間相對細咗，所以唔會做什麽特色牆呀文化牆，實際啲做高身電視櫃好過啦，放到擺設計之餘又有大把貯物空間，仲加咗燈來點缀添。c櫃用盡幅牆來做，又係貯物嘅好幫手，我當然又加燈點綴啦，低身鞋櫃裝鞋之餘又可做茶几，L型梳化床夠晒一家大細坐定定睇電視，間唔中可打開瞓吓廳做廳長或招呼朋友都得。餐枱買咗偏大嘅，可以擺魚缸同裝飾品，天花裝兩盞燈，一盞吊燈在餐枱上，一盞在梳化頂，雪櫃放廳，為配合整體性，大門及厨廁門都油白加線條，一個字『靚』
厨房
主要配置：做L型上下厨櫃，鋁天花連兩燈筒，五金掛架，厨房電器及用品
加改位：改灶頭來去水管及電掣位置
自我評價：改灶頭令抽油烟機條喉直接出街，唔浪費厨櫃位。厨櫃用磨砂面，比較防刮花及易打理，用電磁爐冇咁熱又安全啲，加鋁天花美觀兩燈夠光猛。
http://cyclub.happyhongkong.com/redirect.php?pid=4113035
廁所
主要配置：26吋石面地櫃，煤氣爐，浴室寶，鋁天花連兩燈筒
加改位：加電掣
自我評價：電掣一定要加，唔做浴屏天氣差時可掛一機衫上去晾，潮濕時可駁抽濕機，浴室寶，冬天沖涼有佢最好
希望此文幫到大家，下面有相睇
點整架？本帖最後由 rainbow` 於 2017-06-10 21:56:23 編輯
