曾經細絕全港，實用不足200方呎的長實（1113）大埔嵐山劏房深受辣招綑綁，放盤極罕，近年租盤一出即租，鎖匙盤是絕無僅有，然而隨住辣招陸續鬆綁，劏房鎖匙盤最終作零的突破。記者日前直擊一個不足200方呎的嵐山劏房，只是住了兩年多，已殘樣盡露。業主唔再出租，決意止賺離場，但叫價勁狼，喪叫380萬元，呎價近1.94萬元，仲貴過十大屋苑龍頭太古城。
3年前長實大埔嵐山開賣，墳景、劏房哄動全港，實用不足200方呎的劏房被形容尤如囚室。劏房放盤短缺，除了發展商開放過後，一直以來，二手劏房想睇都難。入伙至今，劏房逾10宗二手成交，大部份唔睇樓就易手，部份業主見好賺，甚至代客硬啃額外印花稅。
然而隨住辣招鬆綁，劏房鎖匙盤終於蒲頭，為9座高層戶，實用面積196方呎。記者日前直擊這個難得一見的劏房匙盤，無房間隔，一眼睇哂，向東南，外望吐露港，左邊山景，非向墳景方向，算是托賴。業主2014年以逾200萬元買入，兩年來一直收租每月7,900元，坐享逾4厘回報。出租2年多，租客唔錫住，內櫳殘樣盡露，牆身沙眼污跡肉酸。廁所污哩單刀，入廁地磚一大撻跡，浴缸防水膠邊發霉。
撇除大門小玄關，廳房廚合一的正方形空間就8呎乘10呎10吋，面積近87方呎。所謂開放式廚房，是沒有煤氣喉的鋅盆連櫃面，要你用電爐。櫃內連洗衣機來去水喉，旁邊預留洗衣機位。換言之，87方呎空間，擺床並非不可，只是擺了空間剩不多。
業主家陣見劏房升價，索性放賣，然而叫價勁狼，吊高價至380萬元，呎價高達19,388元。比較同類劏房，上月份8座11樓A室，實用180方呎，以338萬元成交，呎價18778元已經好癲。今次業主叫價比上一口癲價，嗌高3%。
睇返指標屋苑鰂魚涌太古城呎價徘徊1.6萬元，新近成交如銀栢閣低層D室，實用922方呎，成交價1,550萬元，呎價16,811元。今年以來，太古城5宗同呎戶成交，最貴一宗紫樺閣高層戶，今年5月以1,720萬元售出，呎價也只不過18,655元。
記者：陳家雄
攝影：朱家駿
歡樂香江
幸運星
