見證觀塘36載日與夜 「舊麥」料月底正式講再見

folee0001

見證觀塘36載日與夜 「舊麥」料月底正式講再見

又一所麥當勞淹沒在時代巨輪下。觀塘裕民坊麥當勞於1981年盛夏開業，紅色霓虹光管襯上醒目黃M字標記，木紋樓梯伴著吵嚷爸媽帶他們去吃開心樂園餐的小孩成長，一代又一代細路與麥當勞姐姐在蘋果樹下開生日派對。晨光穿透玻璃窗36載，與室內微黃燈光互相輝映，使這裡日與夜仍保留一室溫暖。坐在那張與時代脫節的轉轉凳，一窗之隔外面世界物換星移，麥記恍如從未改變。這裡人稱「舊麥」，盛傳結業多年未見閉門，原來2017年是她真正的終點，據悉舊麥將於8月30日結業，人們的回憶終要劃上句號。

記者 袁楚雙

早餐店

1970年代觀塘區工業發展起飛，人口迅速增長，鄭伯伯住在觀塘翠屏邨一帶，在現時商場APM後面的工廠大廈區開設自己的公司。那些年觀塘仍然荒涼，「嗰時呢度（裕民坊）都未開發。」今年已經80多歲的他說：「我睇住麥當勞開張。當年麥當勞(設施)已經好齊全。」鄭伯伯一周至少3次到訪，這天又剛好來吃個早餐再回公司上班，近年他已遷居石硤尾，但仍然會經過麥當勞，「呢度又平又方便，當你有個基地喺度，你都會幫襯。」不過這家舊麥終需拆卸，「(結業)都冇辦法......佢搬走，另外會有人嚟，社會變化就係咁。」

瞭望台

裕民坊巴士站人車流轉不止，Simon坐在舊麥玻璃窗旁邊看到得入神。居住觀塘5年，他常在中午來訪，買杯飲品過日晨，「（呢邊）好坐過一般快餐店，冇人理你，買咗嘢就坐喺度飲，你鍾意幾時走就幾時走。」坊間食肆或茶餐廳多數不容久坐，「會有面色畀你睇囉，呢度唔會。」Simon所坐的窗口位頗為搶手，木造轉轉櫈早被人坐爛，「咁有嘢望，對眼都好啲，等人嘅時候你望吓到未，唔使行街咁熱」。然而來舊麥2、3年，窗外換上新景觀，「（觀塘變化）好快，我記得以前望過去（觀月·樺峯）有間錶行」現時一排小店消失，地盤前的舊樓變身巴士站，連舊麥也不做了，他亦有點感慨：「唔知搵邊個地方代替佢。」

聊天室

香港寸金尺土，找個可以輕鬆聊上數小時的地方從來不易，觀塘市中心舊麥最方便，其他同區分店不能取代，有冷氣有檯有凳供飲供食，成為大家最佳的聚腳地。蕭同學及余同學在觀塘游泳池習泳後到舊麥用餐傾夜偈，「唔係次次嚟呢度，想食嘢間唔中嚟。」叫他們印象深刻是來訪多次，這裡的變動卻不大，「宜家個個都係電子屏幕點餐，你睇呢度，幾傳統呀！（人手點餐）咁樣好啲，因為點餐機冇得走鹽。」Candy特地到觀塘找剛放工的好朋友Abby聊天，「佢又唔想走得太遠嘛，樓下有小巴可以返屋企，所以過嚟搵佢。」這裡夜晚不算多人，隨意可找到四人座打牙骹，「消費相對嚟講係ok，平啲，即係純粹想傾吓偈，又唔想食好貴又食唔飽嘅嘢。麥記你可以坐耐啲。」

folee0001

陳善南攝(蘋果日報)

舊麥的空間大佔地廣，能在石屎森林中找到一處休憩閒聊的好地方，這裡是不二之選。黃耀興攝(蘋果日報)

舊式轉轉凳市面分店罕見。黃耀興攝(蘋果日報)

舊麥以微黃燈光與木地板設計，陽光穿透大玻璃窗照射入來一室溫暖，不夠冷氣的空間更是熱氣迫人。黃耀興攝(蘋果日報)

麥當勞的木紋地板伴隨過一眾8、90後的小孩成長。黃耀興攝(蘋果日報)

盛夏高溫難耐，老人躲進麥當勞免費冷氣間避暑，是為舊麥之日常。黃耀興攝(蘋果日報)

市建局將重建裕民坊，現時僅餘下麥當勞一間連鎖店未搬遷，其餘大型連鎖店早已離開。黃耀興攝(蘋果日報)

Simon：「（觀塘變化）好快，我記得呢度以前望過去（觀月·樺峯）有間錶行。（宜家）冇晒，一棚（冇晒）。」黃耀興攝(蘋果日報)

孖生兄弟Sunny（左）和Lo（右）小學開始已跟家人來舊老麥用餐，他們形容舊麥比康寧道新麥「大好多」。黃耀興攝(蘋果日報)

八旬鄭伯伯：「（結業）都冇辦法，佢搬走，另外會有人嚟，社會變化就係咁，第時可能起高樓大廈，佢（社會發展）就會咁嘅訊息。」黃耀興攝(蘋果日報)

這裡曾經秒秒鐘歡聚歡笑，曾經有麥當勞叔叔陪小朋友開餐，一切隨著發展步伐淹沒在時間洪流中。黃耀興攝(蘋果日報)

folee0001

中學生的「歡樂天地」 街坊的聚腳重地

歡樂天地

歌手陳康健自小在觀塘成長，在他印象中，舊麥就是個滿載溫馨的地方，「細個婆婆湊我，晨早流流落去食早餐好開心，唔知點解架喎！總之麥當勞就係開心啲好食啲。」以前的舊麥有蘋果樹、供小朋友坐的矮小BB凳，「蘋果樹下面就係開生日會嗰個位，細個好想開，廣告成日『荼毒』你，如果我都係度開生日會就好啦！」廣告歌是這樣唱：時時渴望生日，做主角最開心？不過陳自言家境不算富裕沒當上生日會主角，倒是在上中學後仍然流連舊麥：以前觀塘廣場及裕民坊有大量機舖，男生們去「抄碟」後自然去舊麥「吹水」，聊到口乾更不愁糧食，只因有做兼職的朋友補給支援，「唔知點解買20蚊有40蚊嘢食，成個薯條餐嚟。（舊麥）基本上好似歡樂天地咁。」
隨著年紀漸長，陳已少光顧麥記，但舊麥的多元生態仍然令他著迷，不同人不同事都在這裡發生，「好多人做功課、溫書、拍拖，麥記拍拖我覺得都幾浪漫，以前唔需要任何嘢，有個地方你hea已經好開心。」勾起年少時的戀愛回憶和成長點滴，他不想舊麥執笠，「第一係回憶，第二係方便，以後又少一個地方坐低傾偈食嘢，之後要去好遠。」即使再開一間麥記，他相信也不是同一回事，「唔係嗰種feel。」
舊麥保留溫情，新開的走向變革，他認為麥當勞也迎合時代改變推廣，無法回到以前賣溫情的日子，「香港好似冇咗以前嗰種歡笑，太天真啦，人地唔會覺得有呢樣嘢。宜家個世界複雜咗，好多科技令到成個社會甚至屋企改變，正如點會覺得麥當勞係溫馨，只係去吹下水， 有啲錢寧願去間好啲嘅cafe坐。」
社區中心
活在觀塘創辦人袁智仁小時候曾短暫住過觀塘，離開再回來已經是2003年大學時期，他透露大學的初戀女友在觀塘住，故差不多每日都經過觀塘舊麥，「如果尖沙嘴（等人）係五枝旗桿，咁觀塘等人一定係舊麥，唔係（康寧道）新麥。呢個係觀塘街坊或者所有人嘅地標。」
這個地標的威水史，是她曾經於1981年10月18日打破全球麥當勞每日最高惠顧人次紀錄，威風但不離地，舊麥價錢親民又多座位，是觀塘人重要的活動中心。袁智仁憶述，創辦活在觀塘專頁，不時會與義工們約在舊麥開會，「我哋呢啲冇乜錢嘅NGO，一定約喺麥當勞開會，麥當勞係我哋嘅流動會客室，見記者、見街坊都一定喺麥記。」少年少女在此聊天、打遊戲對決、補習，長者坐在舊麥攤開棋盤對弈，「呢度某程度係觀塘街坊嘅公共空間，一個非正式的嘅社區中心。」

folee0001

回帶上世紀8、90年代的觀塘，袁表示觀塘與尖沙嘴旺角等市中心相比是偏遠地區，但麥當勞某程度代表了先進、文明、西方文化，以前的學生要默書高分才可去食麥記，「對好多屋邨小朋友嚟講，係一個好開心嘅象徵，代表你好接近世界，係我哋睇世界嘅一個窗口。」同期裕民坊發展繁華，仁愛圍附近的CD店據聞連歌手黃耀明也去尋寶，街上有不同走鬼檔、大排檔，大腸、海鮮草根美食齊全，還有兩所戲院，加上麥當勞進駐，社區充滿活力，「自給自足，好似觀塘人嘅尖沙嘴咁。」
不過重建項目將觀塘活力打沉，地標一個個在地圖上消失，袁對舊麥的結束感到傷心，「當最後嘅地標都冇，呢度就好似變成零。觀塘兩個字就只係地鐵站名，入面冇晒歷史，如果有下一代問當年我哋喺邊度等人，連呢啲痕跡都冇，係非常之失落。」他形容僅餘的舊麥已不只是集體回憶，24小時開放為裕民坊的烏燈黑火點一盞明燈，「將來呢度冇嘢食、冇補給，變晒死城，地方好黑會有治安問題，麥記結業不只回憶問題，仲衍生重建過渡中間治安安排，係點樣呢？街坊需要公共空間，政府規劃可唔可以做得好啲？」

舊麥8月30日結業告別觀塘人。陳善南攝	歌手陳康健自小在觀塘區長大，他坦言麥當勞結業後一切已不同，「冇晒feel（感覺）。」張柏基攝	袁智仁當年因初戀女友住觀塘，令他與舊麥結緣。陳善南攝
棋盤戰線也由公園移師舊麥舉行。陳善南攝	舊麥佔地大，巨大玻璃窗是老顧客的最愛位置。陳善南攝	夜幕低垂，舊轉各個角落進駐了借宿的麥難民。夏家朗攝
一塊玻璃隔絕了宵夜人與麥難民，猶如兩個世界。夏家朗攝	舊麥霓虹燈為遊子點一盞燈，結業後的裕民坊又由誰在漆黑中引路？夏家朗攝

cherryybl

Horribleellis

鄧aunti

您旺旺

小城新貌……

folee0001

麥難民大酒店？「早嚟早霸位唔好太早瞓」

夏家朗攝(蘋果日報)

夏家朗攝(蘋果日報)

夏家朗攝(蘋果日報)

夏家朗攝(蘋果日報)

午夜一時環顧舊麥，各個角落、長椅上瑟縮了一個個借宿的「麥難民」，另一邊廂年輕人結群宵夜，偌大空間只餘下他們的嬉笑聲與高分貝背景音樂。

坐在角落的Ben說，每逢午夜這裡的音樂特別大聲，加上年輕人的放肆，「好嘈。(背景音樂)12點後特登開大聲啲。」尋一絲安寧就要用上耳塞，他見過有宿者忍受不了太吵的年輕人阻礙睡眠，「嗌佢哋『咪嘈呀！』，(有效嗎？)靜一陣囉，一陣又嘈過，哈哈。」

Ben家住舊樓天台屋，但獨居生活太悶，任職清潔的他每逢收工就來舊麥坐坐，貪圖它有冷氣無蚊，順便見見打躉的老朋友，「傾吓馬仔，賭波，鹹鹹濕濕嗰啲嘢，呢度幾乎全部都係男人嘛。」在這裡睡覺有潛規矩嗎？「冇，早嚟早霸位。唔好太早瞓，太早經理會拍醒你。」

有時他會去其他麥記看看，憶述前年坪石邨麥當勞有「麥難民」死去，那邊晚上從此便封起肇事位置不讓人借宿，「貪得意走去睇吓啫，我都唔去嗰邊。」最終還是流連舊麥，Ben戲言麥記是「麥當勞大酒店」，「個個都可以嚟過夜，幾好呀，夏天又有冷氣歎，最緊要冇蚊。」日間見到市民在玻璃房內開生日會，見過有怪人婆婆呃年輕人請食薯條，夜晚遇到會介紹散工的同路人，還有年逾七旬的黃伯。

黃伯撐著自製柺杖一柺一柺在餐廳裡走動，不時轉位找個最舒適的位置。他住玉蓮臺，但與鄰里關係不和，家中中層對正地鐵站無風，夏天翳焗就來舊麥，「好多晚都嚟，有冷氣嘛，屋企住嗰度冇冷氣，二嚟啲鄰居唔係幾好。」無兒無女無人家庭，索性來「瞌眼瞓」，他也去過附近地庫麥記，但嫌環境骯髒，不及舊麥乾淨。黃伯伯說時一邊取出用餐單據，一邊咳嗽，「喉嚨痛，我唔鍾意講嘢。(平時有人同你傾偈嗎？)舊時有社工嚟，宜家冇。」之後又指住單據，向記者分享每餐食乜餸。

談到舊麥結業，這些寄居者不約而同指無太大感覺，黃伯說「無乜所謂啫，去茶餐廳坐好過。」Ben指屆時會「跟大隊」隨熟悉的老友記一同遷徙去其他分店。在社會底層掙扎求存，談集體回憶似乎太奢侈：「無話唔捨得，都知佢就拆㗎啦，十幾年前已經話要重建，啲嘢係咁啦。重建好都唔關你事，啲樓咁貴。」

大大隻熊