近日，財政司司長陳茂波宣佈為財政預算案再度加碼派錢，利用政府公帑向今年年滿18歲、無物業、無領取綜援、長生津等政府資助，及無需交稅既人士派發一筆過四千蚊津貼，今次派錢無疑可以令更多市民受惠，只不過財爺宣佈呢個消息後，勞福局局長及關愛基金主席羅致光近日喺唔同場合表示現時四千蚊派錢已涵蓋N無人士，暗示唔會再推出俗稱 N 無津貼既「非公屋非綜援的低收入住戶的一次性生活津貼」，可謂「魔鬼在細節裡」。
全港關注劏房平台對此決定感到非常失望，我地認為派錢唔能夠取代N 無津貼，因為派錢既受惠對象欠缺針對性，唔能夠真正對焦減輕低收入N 無人士既生活負擔，同時平台亦發現部分基層家庭喺今次四千蚊派錢底下，相對於N無津貼所得到既津貼金額更少，出現倒蝕情況，例如一個有兩名子女既四人住戶，如果仔女都未成年既話，根據2016年既N無津貼金額原本應該有一萬三千蚊，但而家喺派錢底下只係得八千蚊，津貼金額相差五千蚊，今次派錢變相令部分低收入N無人士得益減少。
平台一直倡議將關愛基金N無津貼恆常化，令低收入既N無人士能夠持續受惠，根據政府既數據顯示，過往申請N無津貼大部份都係租住私樓既低收入家庭，當中接近五成更住喺劏房等不適切居所。喺現時無租務管制底下，租務市場完全失衡，加上等候公屋遙遙無期，基層市民往往只能捱貴租租住劏房，作為前線同工眼見唔少既街坊都因為租金問題而需要節衣縮食，對家庭生活質素及兒童發展影響非常深遠，而N無津貼就為他們發揮救命草作用，能夠即時紓緩基層劏房戶既經濟負擔，但現時政府將基層劏房戶唯一既救命草都取走，無疑令基層劏房戶既困境雪上加霜。
與此同時，過往政府官員經常表示擔心推出N 無津貼後會令業主相繼加租，津貼變相益左業主，幫唔到基層紓緩困境。平台認為呢種講法並唔合理，只係政府想唔投放資源協助基層既擋箭牌。第一，N 無津貼係一次性既生活津貼，同租金並非掛勾，政府亦唔規限津貼一定要用黎支付租金。再者，N無津貼已先後推出三次，同時喺政府既N無津貼報告上都表示無發現有任何跡象，顯示業主會因為租戶領取N無津貼而特別調高 「租金」。政府根本無充分同合理既理由推搪推出N 無津貼，平台要求政府喺今年重推關愛基金N無津貼，並將措施恆常化，同時關愛基金應為輪候公屋超過三年或以上既輪候人士提供租金津貼，以補貼公屋每月租金與私人房屋市場每月租金既差額，彌補政府無法達到三年上樓既承諾，紓緩基層在住屋方面的經濟負擔。
我地深知N無津貼同租金津貼並非解決基層住屋問題既「靈丹妙藥」，只係可以暫時紓緩基層住屋問題既中短期措施，長遠政府必須努力覓地大量增建公屋先可以真正解決住屋問題，但我地明白增建公屋需時，所以平台建議政府應多管齊下推出各種中短期既住屋措施，紓緩基層市民困境！
基層住屋有出路，視乎政府做唔做！
資料來源：http://www.rthk.hk/…/…/programme/pentaprismII/episode/489494
歡樂香江
幸運星
