三千呎獨立屋，過千呎花園，鍾勵發(Steven)兩個女兒踩著單車，與半個人高的金毛尋回犬在花園穿梭奔跑......四十出頭的Steven，是百分百港男，九年前與泰籍台僑太太定居曼谷。六年前，他用六百五十萬買下這間位於曼谷市郊的dream house，屋苑有人工湖、大草地，女兒入讀附近的國際學校，過著令不少香港人艷羨的生活。眼見越來越多香港人到泰國買樓，他索性以自己做人辦，轉行開地產公司做經紀，專做香港人生意。以為他一定大力唱好，怎知他倒自己米：「泰國地多人少，樓價炒唔起，你地講得客觀啲，因為我見過好多香港人中伏。」
國際學校多但不便宜
香港人以為去曼谷就是嘆世界，Steven強調旅遊不同定居，「你來玩一、兩星期，或一、兩個月，好爽好舒服，住半年，會好悶，住一年，就好辛苦。」Steven花了兩、三年時間才適應下來及學懂泰文，「本地人大多聽唔明英文，一定要識泰文。」Steven妻子的家人在曼谷開廠，定居多年，兩個女兒都在曼谷出世。「呢半年，多左客問帶小朋友來讀書嘅嘢，曼谷確實好多國際學校，質素亦高，但其實學費唔便宜，好多一樣要捐錢及買債券，我女讀嗰間學費算便宜，一個學期都要七萬幾。」Steven兩個女兒入讀曼谷市郊的半國際學校Assumption College English Program, Rama II Campus，小一入學時要借出25萬泰銖和捐贈30萬泰銖，畢業後25萬泰銖可以退回，但並無利息，一年學費連雜費約28萬泰銖。
Steven指，其實曼谷除了食及住之外，其他生活開支並不便宜，「日用品、BTS車費都唔便宜，買車要繳百分之二百嘅稅。」不過，外國人要移民亦不容易。「五十歲以上就可以辦退休簽證，每年續期。另外小朋友來讀書，會有一個監護人簽證名額，方便家長留低照顧小朋友。」
唔好信晒展銷會
若只是買泰國樓當投資，千萬不要因樓價銀碼低，就「即興」輕易落疊。銀行出身的Steven，轉行做地產經紀，源於自身一次荒謬經歷，「我搵左個本地經紀幫手放租層樓，有一日，管理處有事搵我，先知層樓租左出去，但經紀冇同我講。其他香港人來買樓，一樣會遇到好多問題。」
Steven指，泰國地多人少，樓價升幅緩慢，「每年大約百分之五到八，而且地點好重要。首先一定要近BTS車站，另外要揀成熟嘅區份，如Thong Lor及Ekkamai，等同香港嘅銅鑼灣及天后，仲有Asok，屬市中心又有大商場，過左Onnut站就唔好買。」
目前為止，Steven的客都不用做按揭，「外國人一般只能做到五成按揭，發展商嘅新盤可以去到七成，但利息要五､六厘，依家出租回報率只喺四、五厘，唔化算。」一般簽臨時買賣合約時，先給百分之五訂金，回香港後，再電匯另外樓價的兩成五做「大訂」，餘下七成，就待兩、三年後交樓時再匯去泰國。「泰國政府需要買家提交電匯嘅文件，睇到筆錢係由香港匯入來。」
香港經常有泰國樓的展銷會，但Steven建議香港人要親身到曼谷睇樓，了解樓盤附近的環境，「最近有樓盤出現撻訂，個盤雖然近Mochit站，但除左週末先開嘅Chatucha市場外，平日好靜乜都冇。」 http://video.next.hk/mcp/encode/2018/06/05/3625860/20180606_bus_thaihouse2_irving591672_w.mp4
