「怪獸家長」和「直升機家長」充斥香港,他們溺愛下一代的程度往往令人吃驚。近日有網民在社交平台發文怒轟一名在快餐店內只顧玩手機而不替女童取餐的家長,貼文引來網民的關注,不少人反斥發文者的言論是妒忌他人能教導子女獨立。
今日(1日)網民Rex Chan在社交平台上載了一張圖文截圖。圖片為另一名網民Kiki Ho在群組中發布的貼文:「我不知道她是工人還是家人,她坐喺度睇電話而小朋友一個去拎兩個餐,拎完一個到一個!呢個小朋友應該學會自立!」發文者更附上了家長及女童的「打格照」,但從外形所見,估計女童至少有11、12歲。
不過其狠批言論卻惹來網民聲討,紛紛指摘Kiki。貼文在發文後半小時內無故被移除,但卻掀起了網民的熱烈討論。上載貼文截圖的Rex亦對發文者冷嘲熱諷,雙方更一度在網上展開「口水戰」:「祝呢個老母(指發文者)對殘廢仔女早日學識拎餐,唔使再葡萄人哋囡囡識拎餐咁叻。」隨後更獲網民力撐:「好mean,但我鍾意」。
網民更質疑發文者「訓練獨立又有問題?」、「 你教唔到仔女咁孝順㗎嗱,呢啲嘢係葡萄唔到㗎,第世啦你」、「唔好葡萄我,我都會坐定定等我個女幫我拎餐㗎」、「人哋訓練小朋友都有罪,终於明白,香港點解咁多溫室小童」。
網民有話說:
Tse Yan Yan:其實有能力幫人拎個餐有咩咁大不了?嬲人哋唔幫佢拎埋?
Samuel Neko Neko:有咩問題?小朋友自己拎餐唔好咩?
Chungs Chan:其實我覺得各人有各人教法,但又唔使放上嚟公審
陳奕深:小朋友樂意做,係父母嘅福氣。