或謂，買經屋咪又係靠政府，唔可以靠自己拼搏置業咩？有人說：「鼓勵年青人靠自己努力，嘗試經過努力，都無能力置業，先去申請經屋。」哈，原來有些人眼中，經屋竟然係失敗者的「避難所」。面對天價的私人樓，一般打工仔要超過三十年唔食唔用先至可以買到樓，但有無人可以三十年淨搵錢唔食唔用？當然無可能。那就說明，除了少數人收入奇高可以諗私人樓之外，絕大多數人都係無機會買私樓。咁買唔起私樓算唔算係失敗者？當一個人、十個人、一百個人都做唔到的，可以說他是失敗者。但當社會上大多數人都做唔到的，那就不是個人失敗與否的問題，而係社會的問題。當社會出現問題，作為政府就有責任去解決。興建經屋出售，協助市民置業，就是政府理應承擔的責任。經屋係澳葡時代的產物，連一個殖民地政府都有這樣的覺悟，特區政府豈能被官商勾結所蒙閉竟然連這樣的自覺也沒有？
所以，說買經屋又是靠政府不能說是錯，問題是在現代城市中，衣食住行那一樣與政府無關。要食，政府要控制批發市場，要控制食物安全；行，政府大量補貼並主導巴士服務，要進口汽車電單車自用，也要經政府批准型號。住，政府為窮人建社屋，為有一定經濟能力又無法負擔私人樓價的市民建經屋，有何不妥。克勤克儉購買經屋，為未來不必政府救濟，豈有原罪？
