公屋單位大多殘舊不堪？未必！只要肯花錢花心思裝修，幾百呎的公屋在現今「龍床盤」當道的世代，可能是一道清泉。這個位於大圍顯徑邨，實用面積433呎的公屋單位，就是個好例子。
80後夫婦於2017年尾，以330萬元（未補地價）購入此單位。先生Kini從事IT工作，而太太Karry是位銷售員。夫婦表示，「當時睇樓已經好鍾意呢度，前後唔使一個禮拜，已經決定要買。」不少夫妻在裝修期間，時不時出現意見分歧，幸好他們十分合拍，完全無此問題，因早有共識家裏以黑白灰為主調顏色，加上簡單舒適最重要。
全屋裝修走輕工業風路線，黑鐵元素必不可少。一大開屋門，映入眼簾的就是一道寬大的黑鐵磨砂玻璃趟門，陽光直接灑入屋內，光線十足。加上黑鐵儲物架、黑白盒子燈等等，令主題更加突出。以往單位原則為兩房一廳，光線未能帶入客廳，十分昏暗。Karry希望整體空間感大些，提議改做一房一廳。Kini補充，「而家暫時未有小朋友，呢個設計都夠用，就算遲下有小朋友，屋企都足夠放張BB床，小朋友未到4、5歲都唔使有私人空間，我預個裝修Last到5年。」
被問到對家裏有甚麼要求，Kini認為按摩椅和化妝台兩大要求，缺一不可，原來是細心考慮到太太的需要。「太太工作關係，要企足全日，我喺廳嘅梳化隔籬，加多張一人按摩椅，畀佢有個位置放鬆吓。另外，想太太有張梳妝台，放佢自己嘅化妝品同埋香水。」
家裏其中一幅放有滑板的特色牆，是Kini的得意之作。與一般男生一樣，Kini喜愛收藏，將這些購自外國網站的滑板擺設掛出來共賞，一直是他的夢想。另一幅在客廳非常搶眼的英倫紅磚牆，原來是設計師推薦的牆紙，像真度十足，成本700元左右，Karry和Kini一致認為超值，比起淨色牆身「冇咁寡」 ！
兩夫婦都是鞋癡，加上林林總總的雜物，設計師努力用盡每一吋空間。Karry笑說：「我哋真係好多鞋，鞋櫃我哋有要求啦，設計師再幫我哋諗，將冇咁常着嘅鞋放喺房嘅地台。」 除了地台，油壓床也是另一個收納重點，就連行李箱也能放入，這也是家裏雜物雖多，但依然保持簡潔的小秘訣。
Karry和Kini結婚6年，以往一直租屋，當租金不斷上升，便開始有置業打算。Kini回想，「我哋咁多年嚟只係租過一間屋，當時租金加幅都比較緊要，比起Day 1升咗差唔多40%，咁就開始諗我哋都唔後生，要為將來打算。」為甚麼最後選擇買入公屋單位？Kini苦笑，若以330萬元這個價錢買私樓，或只能買到劏房盤，但若購買公屋的話，居住面積可以大很多。「管理上，相對地就一定冇私樓咁好，但我哋想要個小天地，返到屋企舒服就可以。你話有個會所畀我，我哋工作咁忙，都未必會用到添。」兩夫婦亦看中顯徑邨附近的交通配套，尤其是沙中綫將來開通，無論到港島或九龍，都非常方便。
設計師Dennis表示全屋裝修費約25萬元，最貴之處在於訂做傢俬。「主人房嘅面積有兩間房咁大，儲物櫃同埋地台都係度身訂做，所以成本比較高。」Dennis在細節上亦花盡心思，例如趟門使用磨砂玻璃代替全透明玻璃，做出透光不透視的效果，保留私隱度。大門旁的白色儲物櫃設計成「半腰櫃」，而且不貼地面，使空間感大增。
夫婦異口同聲表示裝修後的住所，與Dream House非常相似。只是二人當初花了大部份積蓄在置業上，因此裝修預算有限，最後廚房和廁所沒有改動，保留原本設計。雖然未到盡善盡美，但夫婦能夠在工作一整天過後，有個舒適的安身之所，在香港這片寸金尺土之地來說，算是難能可貴。
設計單位檔案
物業：大圍顯徑邨
實用面積：約443方呎
家庭人數：2人
設計師：Dennis
裝修費用清單：共25萬元
項目／費用
清拆 $22,000
泥水 $35,000
油漆 $33,000
水電 $40,000
冷氣 $10,000
木工 $65,000
地磚 $25,000
燈及家具$20,000
註：連工包料
