|
心情動態：
來自非公營房屋 |
馬鞍山公屋單位傳惡臭 曱甴通屋走
《東張西望》不時報道社會事件，近日一連兩集採訪位於馬鞍山欣安邨欣喜樓的一個單位，那裡頻頻傳出嚴重惡臭，加上衛生環境欠佳，單位成為曱甴的溫床之處。無論是單位入面的衣櫃、大床、雪櫃、地面、門框，還是門外的走廊，都見到滿是曱甴走來走去，曱甴屍橫遍地，而周圍都是曱甴屎和曱甴蛋，令附近的鄰居苦不堪言。惡劣的情況持續三年，鄰居曾先後向房署和區議員求助，可惜仍然未能解決。
《東張》外景主持林希靈訪問鄰居了解情況，最後決定勇闖惡臭該單位了解情況，雖然她戴上口罩，仍然聞到有臭味，而該單位的戶主鍾先生大方讓林希靈和攝製隊進入屋內拍攝。鍾先生由於健康問題，右腳截肢保命，而腰間亦掛住普通膠袋裝住身體的排洩物。由於膠袋不是貼身，令排洩物不時會溢出，影響住處的衛生環境，傳出惡臭。 採訪過程中，鍾生稱自己以前是警察，曾經在葉繼歡案出現在案發現場，講到眉飛色舞，又表示自己有個孖生弟弟，兩兄弟是連體嬰，頭貼頭連在一起，要接受手術分割，而弟弟最終未能救回喪生。由於求助無門，節目與義工團隊為鍾生解決住屋環境的問題，找來滅蟲專家為單位清潔和滅蟲。從攝影師的鏡頭所見，單位內的曱甴無處不在，林希靈一拉開櫃桶，就有廿多隻曱甴湧出來，場面實在好恐怖，令人打冷震。 林希靈接受《晴報》電話訪問，她表示：「其實我本身係超驚曱甴！一開始冇諗過咁嚴重，去到門口嘅時候淨係覺得有非常濃烈嘅臭味。但係到鍾生一開門，我哋成個團隊發現唔對路，因為一開門就已經有成10幾隻曱甴衝出嚟！我同自己講嚟到門口，一定要頂硬上！基本上一路做訪問要一路遞起隻腳，因為起碼有二三百隻曱甴瘋狂地跑來跑去！」她表示鍾生的生活環境真的很差，床上滿是曱甴，連訪問期間都有不少曱甴在鍾生身上行來行去，「其實真係好心噏，製作團隊好好，用一星期搵齊義工、護士同滅蟲專家幫手，當日一齊落手落腳清潔咗6個鐘頭，成個團隊都好勁，真心佩服大家！」 她續言：「清潔嘅過程其實都好痛苦，因為我本身驚曱甴，間屋係每一個位置都有好多好多曱甴同曱甴蛋。最深刻係幫手清潔櫃桶時，每拉開一格都起碼有成二三十隻曱甴跑出嚟，好唔真實。我哋完成清潔之後，都即刻用酒精全身消毒。同埋嗰陣味真係好勁，立即返屋企洗衫沖涼，始終屋內真係好多曱甴同曱甴蛋，好擔心會帶咗番屋企。不過今次做完之後，我諗我真係變咗曱甴專家，而家對曱甴糞便真係好熟悉，早幾日去朋友屋企見到有曱甴屎，即刻同個朋友一齊左搵右搵，然後我哋真係喺啲曱甴屎附近生擒到隻大曱甴，只能講佢哋啲屎我而家一眼就認得出！」      
|
||
|
祝未上樓朋友早日上心水樓；祝已上樓朋友安居樂業！
如果大家有任何疑問或分享..建議大家在適當分區發新帖｡
|
|||
