兩隻牛

justnot1989

兩隻牛

6月10日本欄講「你有兩隻牛」，文末講到假如香港公司有兩隻牛，會發生乜嘢事呢，歡迎讀者提供創意答案！嘩，呢日收到十八個「電郵答案」，可說反應熱烈，認真多謝讀者捧場，其中一位長期捧場嘅紐約某銀行IT專家L就點醒咗左丁山，原來網上早有You Have Two Cows嘅網頁，教左丁山去搵，真係多謝晒，你知啦，左丁山並非網民，更非IT人，好多時在網上存在已久嘅網頁，係完全唔知道嘅。
至於香港公司點樣處理兩隻牛？睇吓讀者答案選錄：
讀者Mok：兩隻牛，一隻去示威，一隻反示威。
讀者HW：賣廣告，打造成名種，賣俾國內富豪。
讀者Juen：你有兩隻牛，決定唔再養牛，等發展商收農地。
還有老友記編輯C來電話：「你有兩隻牛，養在新界小農場，久不久就自由行出街，俾街坊投訴，於是漁農署嚟調查你是否霸佔官地養牛，屋宇署調查你有否僭建養牛棚，SPCA投訴你兩隻牛似受不良照顧；你頭暈眼花之餘，食環署告你出售牛奶冇百分百遵照衞生標準，海關調查你有無違反商品說明條例，於是你覺得麻煩太多，想屠牛賣地俾地產商，攞番一筆退休金，惹來在隔籬租地耕種過吓周末嘅城市業餘農民反對，話你破壞土地生態平衡，引狼入室，跟住有環保團體搵到一位窮婆婆申請法援去司法覆核，你明知自己有道理，但官司纏身，打足三年，兩隻牛已自然死亡，你幅地因太多麻煩，冇人要，於是你搬番市區住，半年後返回舊地視察，發覺已成為貨櫃車停車場，收租嘅唔係你，為咗避免逆權侵佔，你唯有再搵律師出信驅趕霸地土豪，又引起另一場官司……」
咁嘅假想故事聽見都怕，一啲都唔好笑，但好可能符合香港現實，令人遺憾之至。好多年前薄扶林就有養牛牧場，香港公司嘅做法就係將牧場變成置富花園，之後未聽過有甚麼養牛場咯。香港硬係房屋需求極大，私樓公屋起極都唔夠，市民一方面埋怨樓價高，租金貴，另一方面則反對在本區興建公屋，反對填海造地，反對開發新市鎮，幾令人莫名其妙，梁振英假如宣佈停止發展任何新區、凍結基建、不再填海、不再研究新界東北，香港是否會立刻清淨啲呢？

左丁山