秋風起,又係食大閘蟹嘅時候,雖然大閘蟹真係好好味,不過喺進食嘅時候,記得注意以下嘅事項:
1. 成年人每日唔應該攝取超過300mg膽固醇,即係差唔多相等於一隻大閘蟹嘅蟹膏及黃,所以大家每次最好一隻起兩隻止,亦唔好食得太頻密,不過如果身體狀況良好嘅話,偶然食多少少都可以。
2. 進食水溶性纖維含量較高嘅食物,如麥皮、水果及豆類等,可有助帶走體內過多嘅膽固醇。
3. 脾胃虛寒、皮膚敏感、膽固醇過高人士及孕婦不宜食大閘蟹。
4. 大閘蟹附有大量寄生蟲及細菌,切記要完全煮熟先好進食,而且進食前應將內臟徹底清除。
5. 食大閘蟹千祈唔好飲啤酒,因為會寒上加寒,有機會引致嚴重腹瀉。可以黃酒或白酒等溫酒配食。
6. 食大閘蟹唔好同柿一齊食,因為柿含有鞣酸,同大閘蟹內嘅蛋白質結合,會凝固硬化,引致腹瀉。
7. 唔好食濕熱水果如芒果、菠蘿、石榴及榴槤等,宜進食含有維他命C及多種維他命嘅楊桃,因為佢有化解蛋白質及膽固醇嘅作用。
8. 食完大閘蟹後,可飲薑茶袪寒。