尋日對昌偉大廈僭建平台的劏房街坊黎講係大日子，因為爭取長達一年，今日終於等到由業主委託執達主任上門收樓，迫遷安置終有個定案。就係先去屯門寶田的收容中心，三個月後如合符公屋審批資格才可上中轉屋。

我地一早9:30已係昌偉同街坊一齊“恭候”執達主任大駕光臨。執達主任約10:30到達，為每戶開出memo俾房署證明收回單位的住戶無家可歸。

正常收樓安置程序係要一日走三場：執達主任辦事處（深水埗的西九龍裁判法院）>樂富房署清拆安置小組>屯門寶田收容中心。
其實辦安置手續要分秒必爭，因房署同收容中心只認當日法庭發出的文件，如趕唔切係辦公時間完成手續，請第二日重新辦一次，即係所有程序同地方都要做多次、去多次。

點知尋日咁好彩黎既係一位高級的執達主任，咁佢話因為佢已可開出法庭memo，所以街坊唔洗去執達主任辦事處，走少一轉，可直接去房署就ok，咁大家都好開心。其中一位有處理安置經驗的社工，話晚上九點前到寶田都可辦到入住手續，所以時間都鬆動，大家都覺得輕鬆。

到房署，開始嘔血，第一：我地一行十幾人12點已到房署，執達吏封信叫我地去二樓，但二樓唔見相關辦事處的指示，我地問保安，佢話唔知，叫我地排隊問詢問處，個時約有廿人排緊隊，咁都無計，惟有照排。之後，有人周圍問，問左一輪先知原來清拆安置小組係三樓，但房署總部係無任何指示！此其一。

第二：三戶分別入房見主任辦手續，15分鐘後，街坊同職員一齊出黎大聲話：三戶的三份文件都有問題！有填錯身份證號碼，有漏填case no.，最誇係連日期都填錯！全部人要返西九龍裁判法院出過份文件，再去返房署。其中一位主任認出個位＂高級＂執達主任，咁誇張地甩碌的情況原來唔係第一次，即係已經好多街坊奶過野，而個位高級執達主任好明顯仍然在位，亦從無改正！
攪一攪，收樓安置程序由變左一日走三場變左一日走六場：樂富房署清拆安置小組>執達主任辦事處（深水埗的西九龍裁判法院）>樂富房署清拆安置小組>屯門寶田收容中心>葵涌昌偉>屯門寶田收容中心。

第三：其中一戶街坊被房署主任要求即時要交到家人的死亡證同仔女出世子！但根據網頁資料，入住收容中心，只要係有執達吏開出文件證明收樓時住戶無家可歸，再加埋係香港居民，即係有香港身份證已ＯＫ，點解無啦啦係被迫遷咁混亂徬徨既時刻，要求呢Ｄ唔太緊急的文件呢？街坊唔知要出示呢Ｄ文件，無帶係身，要搬屋一時間亦唔知收左係邊，頓時非常徬徨，驚會因為咁而辦唔到手績入收容中心，咁就真係無家可歸了。咁我地就同主任講無呢Ｄ文件，可唔可以遲少少補交，主任仍好堅持。之後另一位貌似較高級的主任就細細聲（但其實全世界都聽到）勸佢話：＂Ｘ，其實唔洗交呢Ｄ文件住架，有身份證就ＯＫ，其他野叫佢之後幾日補返去寶田個邊，叫寶田掉返俾我地對就得架啦＂。個位主任聽罷心有不忿話：咁ＯＫ啦。

知悉噩耗，已經到一點放飯時間了，所有法庭同政府部門都暫時辦公。咁唯有等，街坊憂心忡忡是旦拿拿聲食係附近食d野，就搭車趕去深水埗等佢開門。食野其間，有人再打去寶田confirm收幾點，答案係六點。去到又見返個位“高級”的執達主任，係佢辦公室再出過封信，街坊再三提醒都要出到第三次先無錯漏！公務員噃！再三對好文件資料無錯，即刻飛的返樂富房署再辦手續，佢地話寶田收五點。即係我地從唔同渠道知道有三個唔同的收工時間，但無從查證到底係幾點閂門？係房署攪完都三點幾近四點，咁梗係唔敢搏啦，原定安排係返葵涌舊屋執埋野，一次過入寶田，依家惟有改變行程，先入寶田辦手續，之後再返葵涌搬野。係樂富辦完文件即刻搭258D入寶田。

訓醒幾轉終於到寶田，到第六座地下的屋邨辦事處，個reception位好細，幾個人企已好迫，但寶田係收容中心及中轉屋，係香港最重要的安置屋邨，住戶流轉率高，經常有人黎辦入住和退租手續，要容納咁高使用量明顯係唔夠地方。等左陣有位中年婦女探頭出黎裝，第一句就話：“咩咁多人架！” 狀甚不滿，之後叫哂我地入會議室，攪左一大輪，先拎一堆form出黎掉低一句：“你地要填哂佢！”零解釋任何程序同守則。街坊填完後佢走入黎對資料，一路睇一路問：＂點解你兩個仔個姓唔同既得意既？＂我地問佢同入住程序有咩關係，佢話要了解佢家庭關係，咁街坊無奈下係所有人面前解釋自己過去的婚姻情況。之後又大大聲問另一位離左婚的街坊：＂咁你有無再結婚呀？＂因其中一戶三父子，大他得18歲，個細仔得十歲，我地知道如有成年子女家庭都要分開唔同座住，咁就問可否盡量試下安排佢地一家三口一齊係相連床位住，佢即刻提高聲線：＂唔得架，我地呢度規矩成年子女無得一齊，你呢個情況爸爸同細仔就去第二座，大仔就要去第三座。＂但係爸爸要返工搵食，哥哥要睇住細佬噃，佢都堅拒要分開。另一戶其中一人在外地留學，九月開學就不能每天在收容中心過夜，咁想了解下收容中心的出席率點計，會否因此失去上中轉屋的資格呢？個職員又話唔知，要交俾房署決定，我地頓時大吃一驚，下，你地咪係房署囉！佢答我地係房署外判負責管理寶田邨既管理公司黎架咋！原來，寶田係連一個房署職員都無的，全部外判！可想而知，房署有幾重視安置情況啦，山高皇帝遠，又點監督呢？爭持一輪，有個貌似資深的職員入黎話睇睇床位情況，其實都可以試下安排一齊的。

如是者，都成個幾鐘，七點先安排到配床位，跟保安去辦住戶證同拎locker鎖匙。街坊對於獲配家庭房安排喜出望外，保安回頭再補充＂熱水唔係廿四小時供應架，晚上六至十二點，早上七至九＂。再望下張床連床褥都無，要趕係舖頭收工前去買，如果唔係就要訓木板。收容中心無冷氣，但折騰左一整日終於確定唔洗訓街，街坊去到呢個moment竟然話"都唔算好焗啫"，其實是日都三十幾度。已經晚上七點幾，飯都未食仲要趕返葵涌執野搬野，要趕係收容中心十一點閂門前攪掂哂。

7月30日，聽起來是普通打工仔的星期一，但對於昌偉大廈被迫遷的街坊來說是一場惡夢。經歷長達一年的抗爭，今天終由業主委託執達主任上門收樓。這一天我們全程陪伴街坊，總結當日歷程，分享如下：

正常收樓程序是一天走三場，首先被迫遷的街坊要去到西九龍法院大樓執達主任辦事處拿取無家可歸証明文件，然後去樂富房屋署清拆安置小組核實身份証明，再去寶田臨時收容中心登入住，時間已經很匆忙。

當天才知道，有高級的執達主任在場，可以即場拿取無家可歸証明文件，就不用去西九龍法院大樓執達主任辦事處，而直接去樂富房屋署辦理手續。但世事往往都不是盡如人意，當去到樂富房署，房署清拆安置小組主任說執達主任提供的無家可歸証明文件錯漏百出，不是填錯日期，就是填漏地址和檔案編號。結果當天由一日三轉變成一日六轉: 昌偉大廈出發>樂富房署清拆安置小組>西九龍法院大樓執達主任辦事處>樂富房署>寶田臨時容中心登記>昌偉大廈搬家當>再回寶田臨時容中心。唉！由早上九時至到晚上十一時，街坊終完成「搬屋」程序，歷盡千辛萬苦。當中有幾個要點值得跟進：

1)業餘的「高級」執達主任
由於法律文件不能出錯，一字一句也要清清楚楚，但「高級」執達主任填上簡單的法律文件也能錯漏百出，連累街坊。

2)房署職員態度惡劣
房署清拆安置小組職員態度惡劣，處處刁難街坊，卻要求街坊遞交不相關的文件，如：出生証明文件，婚姻關係証明文件，要知道街坊的狀況是被迫遷的，是無家可歸的，身上只有執達主任提供的無家可歸証明文件和身份証，其餘文件是沒有帶在身上的。何況無論房署網上的資料、執達主任提供的文件也沒有說明當天收樓程序要帶上什麼文件，收容中心幾點關門，資訊可謂十分不透明。

3)甚麼也不知道的寶田臨時收容中心主任
當街坊來到一個陌生環境，自自然會問一些有關收容中心的問題，但協助登記的寶田收容中心主任甚麼也不知道，極其敷衍了事。以為他是初入職的新手，原來已是主任級了！

4)受盡試鍊的臨時收容中心
酷熱天氣警告已持續生效14日半，共348小時，但過往努力爭取臨時收容中心加裝冷氣機，今天房署仍然懶理……冬天也有冬天的問題，要知道熱水對街坊來說是多麼的重要，但臨時收容中心只是限時提供熱水的，只在晚上6時至12時及早上6時至9時供應。喂，你以為今天是六、七十年代的制水時期。

5)安置程序只能安置人，卻不能安置街坊的家檔。
由於臨時收容中只有一個細小的儲物櫃，不能安置街坊家當。家當對基層人士來說是生命財產，結果普遍街坊只能將家當送得就送，丟得就丟。

我們跟足全程，整個安置程序，由被迫踏出家門的一刻，就是苦難的開始⋯⋯這個政府，枉她仍說自己是以人為本。